बाजुरा,२३ जेठ- शुक्रबार दिउँसो करिव ३ बजेर ३० मिनेटमा ग्यासको सिलिण्डरबाट आगलागी भएकाको क्षतीको विवरण संकलन गरी प्रदेश र संघ सरकारलाई राहत माग गर्ने निर्णय गरिएको छ ।
बुढीगंगा नगरपालिका–६ मा पर्ने बाम्का बजारमा नवदुर्गा होटलमा खाना पकाउने ग्यास पड्किएर आगलागि भएर ३० पसलहरु जलेर नष्ट भएको जिल्ला प्रहरी कार्यालय बाजुराका प्रहरी नायव उपरिक्षक इकवाल हवारीले जानकारी दिएका छन् ।
ग्यास पड्किएर खुद्रा तथा कपडा व्यापार गर्दै आएका स्थानीयहरुको टिनले छाएका पसलहरु जलेर नष्ट भएपछि जिल्ला विपद व्यवस्थापन समितिका संयोजक तथा प्रमुख जिल्ला अधिकारी मेघनाथ पाध्या सहितको टोलीले घटनास्थलको अनुगमन गरी तत्काल सरकारसंग राहत माग गर्ने बताएका छन् ।
आगलागिबाट पिडित भएका उनीहरुको क्षतिपुर्तिका लागि प्रहरीलाई तथ्यांक संकलन गरी जिल्ला विपद व्यवस्थापन समितिबाट प्रदेश र संघ सरकारलाई आवश्यक राहत माग गर्ने निर्णय गरिएको प्रमुख जिल्ला अधिकारी पाध्याले बताए ।
घटनास्थलको अध्ययनपछि सोही पालिकामा जनप्रतिनिधी राजनितिक दल सहित सरोकारवालाहरुको आकस्मिक बैठक बसेर क्षतिको विवरण संकलन गर्ने र सो क्षतिपुर्तिका लागि राहतको विपद प्राधिकरण,प्रदेश र स्थानीय तहसंगै संघसंस्थाहरुलाई आग्रह गर्ने निर्णय भएको छ ।
जिल्ला विपद व्यवस्थापन समितिको आकस्मिक बैठकमा बुढीगंगा नगरपालिकाका नगर प्रमुख रामबहादुर बानियाँ,बडीमालिका नगरपालिकाका नगर प्रमुख अमरबहादुर खड्का,पुर्व प्रतिनिधी सभाका सदस्य लालबहादुर थापा लगायत बैठकमा सहभागी थिए ।
बैठकले आगलागिबाट पिडित भएकालाई एकद्धार प्रणालीबाट राहत वितरण गर्ने पनि निर्णय गरेको छ ।
विपदमा विभिन्न संघसंस्थाहरुले आफु अनुकुल राहत वितरण गर्ने गरेकोले सो राहत नगरपालिका मार्फत एकद्धार प्रणालीमा वितरण गर्ने निणय गरिएको बुढीगंगा नगरपालिकाका नगर प्रमुख रामबहादुर बानियाँले बताएका छन् ।
आगलागिबाट वास्तविक पिडितले राहत नपाउने र राहत अर्काे व्यक्ति पाउने सम्भावना विगतमा पनि भएकाले सो कार्य रोक्न पालिका मार्फत राहत वितरण गरिने बताए ।
जिल्लामा हुने आगलागिका घटना नियन्त्रण गर्नका लागि स्थानीय तहहरुमा दमकलको भने अभाव रहेको छ ।
यहाँका ९ वटै पालिकाहरुले गाडीहरु खरिद गरेका भएपनि विपद पर्दा अत्यावश्यक दमकल नहुँदा समस्या हुने गरेको छ ।
शुक्रबार दिउँसो ३ बजेर ३० मिनेटबाट आगलागि सुरु भएको हो । आगो बेलुकी ६ बजेर ४५ मिनेटमा नियन्त्रणमा लिइएको हो । आगो नियन्त्रणका लागि नेपाली सेना, सशस्त्र प्रहरी बल, नेपाल प्रहरी, नेपाल रेडक्रस, स्थानीयहरुको सक्रियतामा आगो नियन्त्रणमा आएको जिल्ला प्रहरी कार्यालय बाजुराका प्रहरी नायव उपरिक्षक हवारीले बताए ।
आगलागिको क्षतिको विवरण शनिबार विहानबाट संकलन गरिने प्रहरी नायव उपरिक्षक हवारीले भने । आगलागिबाट करोडौको क्षती भएको प्रहरीको अनुमान रहेको छ ।